Taipei (Dawan) Warbaahinta caalamiga ah ee RTI ayaa sheegtay in Jamhuuriyadda Somaliland ay si weyn u xoojisay joogitaankeeda diblumaasadeed ee dalka Taiwan, kadib markii ay si rasmi ah u daahfurtay xarunta cusub ee Xafiiskeeda Taiwan, taas oo taas oo laga furay Aagga Diblomaasiyadda ee Tianmu, magaalada Taipei. Sida say sheegtay RTI, tallaabadan ayaa muujinaysa sii xoojinta xidhiidhka saaxiibtinimo, iskaashiga iyo wada-shaqaynta wax-ku-oolka ah ee ka dhexeeya Jamhuuriyadda Somaliland iyo Taiwan.
Warbixintan oo Wargeyska Dawan ka soo xigtay RTI ayaa lagu soo bandhigay miisaanka dimlumaasiyadeed ee loo sameeyay munaasibadda xadhiga lagaga jaray xarunta cusub, taas oo ay ka qayb galeen masuuliyiin sare oo ka kala socday Somaliland iyo Taiwan, diblomaasiyiin, ganacsato iyo marti sharaf kale. Wakiilka Jamhuuriyadda Somaliland ee Taiwan, Danjire Maxamuud Aadan Jaamac Galaal, ayaa u sheegay warbaahinta TRI in xarunta cusub ay kor u qaadi doonto hawlaha diblomaasiyadeed, xidhiidhka labada dhinac iyo hirgelinta mashaariicda iskaashiga ah.
Sida lagu sheegay warbixintan, masuuliyiinta Dowladda Taiwan ayaa iyaguna dhinacooda tilmaamay in goobta cusub ee xafiisku ay astaan u tahay kalsoonida, saaxiibtinimada iyo xidhiidhka sii kobcaya ee u dhexeeya labada dhinac, kuwaas oo ku dhisan qiyamka dimuqraadiyadda, xorriyadda, horumarka iyo ixtiraamka wadajirka ah. Sidoo kale warbixinta ayaa iftiimisay sida uu u xoogaysanayo xidhiidhka iyo iskaashiga labada dhinac tan iyo sannadkii 2020, gaar ahaan dhinacyada caafimaadka, waxbarashada, beeraha, tiknoolajiyadda, tamarta, horumarinta kaabeyaasha dhaqaalaha iyo kobcinta awoodaha hay’adaha dawladda.
